【專訪】修頓扭波片網上爆紅 64歲劉榮業:我唔識失敗點寫
柬埔寨曾志偉香港足球修頓東革阿里阿仔劉榮業
前香港足球代表隊前鋒劉榮業,早前因有一條他在修頓踢小型球的扭波短片而爆紅網絡,球迷大讚這位已屆64歲的上世紀本地球星仍然扭得,自言是「光頭阿叔」的「阿仔」笑言,就算數年前曾接受心臟手仍然扭得,除了懂得養生外,更重要是有永不言敗的心態:「就算玩波,都唔鍾意輸。」
與前港足教練郭家明及著名演員曾志偉等同期出道,73年便踢甲組的劉榮業,在87年掛靴,雖不再踏本地球圈,但生活仍離不開足球,只要有空便會無論在柬埔寨或返港都會參與不同的友賽;早前有球迷拍攝他參加一場元老小球賽的短片,修剪他假腳插花及扭波波片段,除吸引到傳媒注意,在YouTube錄得超過62,000次點擊,球迷大讚他寶刀未老,現役球員沒有一個有他的技術,鬥心一流。
綽號「蠱惑仔」、「老鼠仔」的劉榮業早前從柬埔寨經港返國內打理其化工生意時,抽空接受訪問時被問到是否知道在綱絡爆紅時,他笑言,完全不知道有球迷拍片,還將片段放上網,一條小球片也有幾萬人看,好誇張,他說:「我都有上網睇條片,亦估唔到咁多人欣賞,自己掛靴好多年,完全估唔到,仲有咁多人讚賞,始終退役多年,現在是60幾歲的阿伯,年輕一輩冇人識,五、六十歲可能知道,而有啲老球迷會知道我返香港踢小型球專登落嚟,事實上,足球帶給我有好多美好時光。」
不煙不酒,早睡早起的劉榮業其實早有心臟病,當年效力愉園在季前集訓時曾接受身體檢查,知道心臟有條血管阻塞,但一直未在處理,到六、七年前定期做身體檢查時發現再多三條血管有此情況,並立即入院接受「通波仔」手術,他透露,現在心臟有支架,而醫生指波可以踢,但就要減少頂頭槌及心口控球。」
除心臟有問題,他還有鼻敏感,另外尾龍骨等都有問題,但劉榮業為人好勝,對其他運動如高爾夫球提不起勁,只有到足球場找到屬於他的天地。他說:「在灣仔長大,當年日日操,在球場瞓,瞓醒就練,假身在修頓練,我踢左翼,必須推落底線,教練要求左腳控波,再用右腳出波,到廿幾歲覺得左腳唔夠好便再操,操到自己左右腳都得;足球是工多藝熟,操得多便會好。」
很多同期隊友到60幾歲已甚少落場,但為人好勝的劉榮業仍堅持,因鍾意足球,在球場可再次享受贏波感覺,賽後在飯局與舊隊友聚舊。眼中仍可找到火的「仔哥」說:「就算友賽都唔想輸,所以好認真。叫啲隊友畀啲鬥志,認真啲好;雖然我哋年紀大,但落場就要有鬥志,好波冇用,年紀大都要去拼,唔拼搏冇意思,同做人一樣,人生亦一樣,年紀大都要有鬥志,而我教仔都一樣,做事要有鬥志,得與失要看上天安排,做便要做足本份,拼到最後。我唔識失敗呢兩個字,你識寫出來,但我唔識寫,因為人生中冇呢兩個字,未斷氣仍可搏命,唔得咪再嚟過。」
「仔哥」仲話:「到今日好多人畀面,出到球場仲有好多人記得我呢個老人家,仲有讚美聲音,唔錯啦,由口靚仔到今時今日,踢波畀人讚足幾十年,人生仲想點?呢係有錢買不到,足球帶畀自己好多歡樂。」
雖然劉榮業身體有不少毛病,但仍踢得,除有心外,可能與進食馬來西亞國寶東革阿里有關,他透露:「呢隻健康食品食咗比較身體好,愉園80隊友都有食,踢完波不太疲倦。」
劉榮業當年在球圈無人不識,兩次世界盃外圍賽助港隊出線,賽後出席電視台節目,到酒樓飲茶食飯從不用等位,只是足球帶給他只有名譽,沒有太多實利,他說:「77年世盃外,自己係無名小子,射入一球,幫港隊出線,一夜成名,而香港兩次出線世盃外,自己都有份,球員嚟講應該得我一個,一世人人可以幫香港拎到兩次世盃小組冠軍,以香港一個咁細地方,好難得了,雖然最後未能再晉一級,但已經唔容易。77年凱旋返港初初有啲飄飄然,但冷靜落嚟,因為知道如球會表現唔好便會被詐型,好快就重新集中在足球。」
現於柬埔寨從事做冰廠及化工公司的「仔哥」,另兼營飲食,在大陸主要是化工;生意大少不願說,只透露每星期在當地踢吓友賽,有時便會到國內,或經港時帶些貨物到柬埔寨。
劉榮業
出生日期:18/08/53(64歲)
綽號:「蠱惑仔」、「老鼠仔」、「阿仔」
曾效力球會:愉園
位置:前鋒、左翼
個人榮譽:香港足球先生(84/85)、香港足球明星(3次)、香港代表隊(73-85)
國際賽紀錄:39場入24球
現職:商人
劉榮業月初短暫留港接受《蘋果》訪問,現已返回柬埔寨。 何家達攝