唔講唔知，恒隆地產（101）集團傳訊助理董事關則輝乃「財經界街坊食神」，佢同好多人一樣，鍾意喺facebook上載美食相，不過佢唔係晒命、晒食好西嗰種。相反，佢係極之支持本地小店，每逢放假都去勻全港九，幫襯開業幾十年嘅地道小店，蛋牛治、粥粉麵都係佢至愛。
噚日雖然天寒地凍，但佢依然準時晨早7點出動，一支公走咗去佐敦幫襯「新興棧」食魚鮫粥，睇佢介紹先知道呢間粥店因位於公廁對面，熟客叫佢做「廁所粥」。
關則輝亦相當鬼馬，喺fb留言話：「佐敦搵食要心無旁騖，樓上是女子理髮，梯間還有女郎和撩人的眼神，電光火石間我們有過眼神接觸……」唔知佢返到屋企有冇俾老婆扭耳仔呢？

過去兩三年，關則輝差唔多每個星期日朝早都去幫襯一間小店，佢仲袋住本簿仔做紀錄，至今已經為過百間小店做咗筆記，名副其實係一本「輝哥小店食評」。佢笑言，試過好多都有中伏，中伏就唔提，食過覺得好嘅，就寫上自己fb，公諸同好。
關則輝經常掛喺口邊嘅係「情與味」，地道小店嘅食物唔會話超好味，但佢認為，老闆與顧客之間嘅交流，小店滲出嘅人情味最為重要。好似茶果嶺大街「榮華冰室」，由一對夫婦經營幾十年，關則輝係熟客仔，試過中秋節去飲杯奶茶，對方竟然請佢食月餅，窩心到呢。

李華華
mailto:[email protected]