【新增動新聞】
經過漫長球會賽季，唔知梅斯達菲係咪仲掛住同山神喺阿仙奴並肩作戰嘅日子？周四洲際國家盃B組賽事，德國守將梅斯達菲早早送大禮，造就阿歷斯山齊士為智利開紀錄，但「日耳曼兵團」靠慕遜加柏嘅史甸度入波逼和1:1完場，雙方兩戰同得4分，出線形勢樂觀。

德國呢場作出4個正選變動，其中上場犯錯嘅門將賓特尼奴被貶後備，由達史特根把關，馬菲亞斯真達、歷卡斯蘇尼同安利簡恩亦悉數擔正，不過智利亦有山神復任正選猶如猛虎出柙，4分鐘就靠隊友維達爾閂到梅斯達菲後場傳送，山神截到後隨即同維達爾撞牆再壓入禁區射近柱，達史特根欲救無從，為智利開紀錄之餘，兼射入代表國家隊上陣112場以來第38個入球，超越沙拉斯成為國家隊歷來神射手！

德國失波後搶番主動，但先要靠門楣擋住伊度亞度華加斯起腳，直至41分鐘終於扳平，安利簡恩斜線妙傳，祖拿斯赫達左路傳中，史甸度撞射入網扳平1:1，亦係佢連續兩場洲際盃取得入波。兩邊下半場各有攻勢，山齊士罰球僅僅高出，史甸度射門亦被沒收，德國教練路維亦離奇地全場未有作出換人，最終雙方踢成1:1完場，同得4分下智利憑較佳得失球排榜首，雙方喺周日最後一輪賽事只要和波就肯定出線，智利會對澳洲，德國就火併喀麥隆。