當年今日
關於我們

【即時文摘】曾芷君艱險奮進(左丁山)

蘋果日報 2013/09/12 06:00


山西省有小童遭兇殘之人挖去雙眼,震驚全國,香港眼科名醫林順潮離開中文大學,唔做眼科講座教授之後,到中建大廈開業,又在深圳開辦眼科醫院,以佢之名氣(按:全城名人如要醫眼,幾乎雲集林順潮醫務所,唔信可以問吓黃毓民),自然資金不愁。山西慘案發生後,林順潮第一個企出嚟話可以利用電子眼最新科技逐漸為小童恢復部份視力,山西醫生就大潑冷水,話林醫生只係搵實驗對象。但無論點講都好,小童父母在絕望之下,點會唔乜都試一試吖!果然,在九月九日,小童已到咗深圳開始接受林醫生診治,我地當然非常希望醫療手術成功,為全世界視障人士帶來新希望,加油呀,林醫生!
還有一位極度需要幫忙嘅年青人就是今年入讀中大繙譯系嘅英華女校學生曾芷君,曾芷君已是今年文憑試新聞人物,唔駛多介紹,入學時,中大校長沈祖堯教授親自陪曾會見記者,可見重視。中大繙譯系極度難入,位位新生都係文科生尖子,曾芷君以驚人毅力,克服聽障視障困難,憑「唇讀」讀書,居然考得上佳成績,令人驚嘆!一聽見佢入讀中大啫,好多校友打聽佢揀咗邊間書院,不少人估佢會入崇基或聯合,因呢兩間書院有最多獎助學金,亦有人估佢會入新亞,因為英華女校校長石玉如與丈夫都係新亞畢業生,佢爸爸石治平與媽媽皆是新亞學生,結婚時由唐君毅先生證婚,佢嘅弟弟石丹理以前係新亞書院教授(現理大社工系教授),與新亞淵源甚深,可能影響到曾芷君嘅選擇噃!
入學後,消息傳來,曾芷君果然係選了新亞書院,不過消息人士話:「無謂咁多猜測,一字咁淺,繙譯系在新亞人文館上課,曾芷君入住新亞學生宿舍,行路返學都唔駛兩三分鐘,如入崇基就要坐校巴上山,轉折好多。」咁又係嘅,好多事情諗得太複雜,盞傷腦筋。聽聞曾芷君極度弱視,以後幾年,好需要醫療照顧,如果林順潮醫生有辦法醫得掂山西小童,請佢花啲心機照顧吓沙田中大生曾芷君,唔算奢望嘅!當然亦同時希望新亞校友盡量在各方面支援呢位艱險奮進嘅可愛女孩,包括醫療需要方面。