喺6月3日上演嘅歐聯決賽戲碼，皇家馬德里對祖雲達斯都有唔少同兩軍各有淵源嘅將帥，包括皇馬教練施丹曾經喺1996至2001年踢過「斑馬兵團」，球員方面亦有皇馬射手艾華路莫拉達、祖記前鋒希古恩同中場基迪拉倒戈相向。如今各為其主，皇馬後衛沙治奧拉莫斯就率先放話，表示場內嚴防希古恩冇情講：「我同希古恩嘅關係好好，但我唔會畀佢喺決賽有任何容易『餐士』。」

至於施丹就承認，即使離開祖記16個年頭，但對舊會依然念念不忘：「我喺祖雲達斯成為一位男子漢同更好嘅球員，佢哋係一間偉大球會。喺決賽倒戈將會好特別，因為我嘅心中仍然有祖雲達斯，但目前我為生命中嘅球會皇馬效力，呢場將會係美麗嘅決賽，但皇馬絕對唔係熱門，因為要攻破祖記大門絕對唔易，而且佢哋唔只防守出色，進攻線亦有好球員。」