自從TVB（511）總經理陳志雲獲判無罪後，傳媒估計，堆填區內會有人瞓唔着覺，皆因志雲大師呢鋪強勢回歸，唔知會唔會有大龍鳳。被認為指證志雲大師最出力嘅集團總經理李寶安（MarkLee），睇嚟應該係矛頭直指嗰個嘞。不過，如果當日係MarkLee篤大師出嚟，應該要經過事頭婆六嬸嗰關，照咁睇，MarkLee應該有個護身符。

傳聞鎮唔住個場

不過，華華收到風，話自從TVB賣盤之後，局勢就有啲唔同咗。話說TVB換咗事頭婆後，新老細都未大舉參與公司運作，已經有人好醒目咁向新事頭婆獻媚，你係六嬸會點諗？傳聞話，雖然TVB家陣不時都有班講普通話嘅人出入，但六嬸影響力猶在，加上新老細之一殼王同六嬸、志雲大師向來交情非淺，家陣志雲大師有神保佑，咁MarkLee動向又如何呢？真係要下回分解。
睇番TVB年報，近年坐直升機咁嘅MarkLee，舊年薪津連花紅袍金約360萬，公司3位非董事嘅高層（大師應係其一），薪酬都有300萬至450萬，相差唔遠，甚至分分鐘高過MarkLee，所以有傳佢入咗董事局，但鎮唔住個場，都並非空穴來風。