殺人伴屍18小時 特赦證人述經過
「得閒咪當佢沙包咁打」
體重230磅的肥妹劉美英，在藍田鯉安苑一單位裏，被童黨輪流虐打致死，肥妹在04年7月15日早上9時死後，至翌日凌晨3時才被人棄屍藍田一山邊溪澗；案中唯一特赦證人雞髀向記者講述了他們伴屍18小時部份未為人知的細節，對於伴屍的感受，他說：「死人之嘛，有乜咁恐怖。」
雞髀向記者講述肥妹死亡當晚的情況時，像在講述別人的故事，他語帶輕佻地說：「打咗一輪後，見佢（肥妹）瞓喺地下無反應，我就走過去用耳仔貼喺佢心口位置聽下有無心跳，再同佢把脈；阿細見我冇乜表情，佢就搵隻CD擺喺肥妹個口度，見隻碟無霞氣，大家就認為肥妹死咗。」對於何時學識聽心跳及把脈來判決有沒有生命迹象。案發時年僅13歲的雞髀平靜地說：「學校教囉！」
至於肥妹死後，有沒有人主動替她閉目，雞髀搖搖手說：「佢塊臉同對眼都打到腫晒啦！使乜搞呀！當時大家又唔覺得好驚，但就即時校大冷氣，等條屍體唔好咁快臭。」雞髀說來理所當然。「肥妹屍體一直都放喺廳，我哋就全部匿晒入房去商量點算，其間有人嚟探，就拖佢（屍體）入房，走咗又拖出去廳。」對於為何選擇在凌晨3點棄屍，他很勞氣地說：「唔通日光日白拖出去咩！」
今年11月才滿16歲的雞髀讀至中一已輟學，身高約5呎7吋，身材瘦削；04年3月，在中學認識杜振宇（Toby）的弟弟，自此與案中各被告混熟，個多月後，他在另一名女仔介紹下認識肥妹，幾個月後大家就熟絡了。
對於當晚虐打情形，雞髀續以輕佻語氣說：「得閒咪玩（打）一輪，諗到乜新嘢咪又玩一輪，當佢（肥妹）沙包咁打，打攰咗咪入去瞓囉。」這群由13歲至21歲的童黨，似乎絲毫沒把這個同吃同住同玩的朋友劉美英當一個人來看待。
雞髀近月疑因在旺角「護花」而被多名大漢毆打，他因此要到警署錄口供，對於可能又涉及官司，他說：「我以後都唔敢再去蒲囉。」在社工協助下，雞髀現正在某職業培訓中心學習塑膠工藝。
本報記者