時裝節開幕，財爺梁錦松去行了半圈，入目盡是女裝、晚裝，當然唔好意思隨便掂，所以行得好拘謹，重自嘲：「時裝都係女性生意」。話口未完見到紡織業老行尊陳瑞球（陳永棋叔父）坐鎮的長江製衣攤位，驚喜地說：「這是我行過來第一檔男裝」，記者亦終於影到阿松同時裝近距離接觸。
更大的驚喜就是兩人原來都是順德陳村人，不過阿松就話三十幾年無返過鄉下。有同鄉情誼係唔同啲，阿松落手落腳睇衫，見到球伯有代理生產英國名牌高球服，即刻話：「LYLE&SCOTT你做㗎？咁我以後買多啲，等球伯你賺多啲錢！」呢隻牌子一件T恤都要七百幾。
球伯為人幾幽默，同阿松話阿董身形要着加大碼，同八方就話阿松着美國size細碼就OK，不過又笑住叫八方唔好爆阿董身形秘密，因為「會搞到董生唔敢着衫。」球伯亦好勤力，十點唔到就話「夠鐘返工」，後生仔真係要學。


E-mail：[email protected]