星期六朝早大部份人都睡意朦朧，葵涌有一個中年漢可能見攰，居然坐喺馬路中間，之後仲瞓埋喺地，其他車見到都要即刻扭軚駛去對面線閃避，搞到交通擠塞，真正以一人之力影響世界。擾攘10零分鐘後，中年漢見休息夠拎埋背囊閃人。

星期六朝早8點幾，葵涌光輝圍禾葵里一個巴士站外，有一個中年漢擺埋post，左手撐地坐喺路中心，巴士、小巴等車輛經過都買佢怕，搵路避開佢，唔少車甚至要駛到逆線避開中年漢，一個唔留神隨時引致交通意外。

但見中年漢無動於衷，後來更攤開隻手橫瞓路上，後來一架機場巴士怕撞到佢，唯有停車令現場交通出現擠塞，後車唔知咩事，自然鼓譟響號。而香港人亦充分展示包容，完全冇理會呢位中年漢，過路嘅過路，揸車嘅揸車。

附近返工嘅陳先生話，第一次見到呢位身穿螢光綠、短褲及涼鞋嘅中年漢，佢不時擔天望地，又向經過嘅車同人手指指、口嗡嗡，似乎神志不清，其他人見到咁，唔敢同佢講嘢。陳先生話中年漢瞓地一輪後，又坐起身，最後休息夠孭埋背囊，向荃灣方向行走無咗影蹤。

你敢爆，我敢獎！ 即Call《蘋果》24小時爆相爆片熱線 ：63836568