當年今日
關於我們

【短片】【無綫現「白色恐怖」】余詠珊維穩成功 蔡康年收番簽名李綺雯企硬唔搣

蘋果日報 2014/11/04 06:00

蘋果聲明無綫余詠珊聯署李綺雯即時蔡康年

聲稱自己對反暴力係「義無反顧地支持」嘅余詠珊,被指向聯署反暴力嘅無綫員工施壓要佢哋收番簽名,否則被視為「反公司」,懲罰包括扣減花紅甚至炒魷。

余詠珊日前接受另一周刊訪問時,就反指傳媒斷章取義,話自己冇咁講過(指聯署藝人係「反公司」及需受罰),又表示佢當日係以「個人身份」,於會議上溫馨提示各位員工關於聯署聲明之內容。余詠珊話,佢有感於聲明唔止係反暴,仲係涉及向政府提出要求,故希望簽署嘅員工動筆之前清楚細則及三思。果然用心良苦。

雖然無綫早過余詠珊一步,馬上澄清余詠珊當日所講嘅嘢並不代表公司立場,但呢招疑似、懷疑係、有理由相信係懲罰嘅招數一出,起碼14名員工收回簽名。其中一個搣名嘅,係綠葉兼仔細老婆嫩嘅蔡康年;但亦有堅持誓不搣名嘅,如為人率真跑馬拉松真係跑足全程,唔係做個樣博影相嘅「0靚妹」李綺雯。

今日有報道話,有份參與「Tvb員工自發譴責對記者施以暴力」嘅藝員,暫時只得李綺雯同蔡康年,後者已刪除簽名,但對佔領行動熱誠不減。記者向佢求證時,蔡康年亦直認:「我係有簽過!」至於點解除名,係咪擔心份工不保?佢就表示:「其他嘢我冇補充喇。」

至於0靚妹李綺雯,佢話當日係透過微信見到呢份聯署,於是托友人代佢簽,亦表明冇需要搣名:「我冇聽過余詠珊講呢啲說話(扣花紅或炒魷),我覺得自己冇搣名呢個需要囉,我覺得自己做嘅嘢係啱嘅。呢份聲明係支持前線記者,支持公司有乜嘢問題呢?」

「Tvb員工自發譴責對記者施以暴力」fb:
http://on.fb.me/1uoDyCI

相關新聞:
TVB員工聯署反暴力 高層打壓 不刪簽名者革職:
http://bit.ly/1rVVjle

【CCTVB】余詠珊開腔否認打壓:我對反暴力係義無反顧地支持:
http://bit.ly/1wt6mJ6