中環在線:梁展文管培力兩年
招股唔見影 - 李華華

蘋果日報 2015/06/25 00:00


69歲前高官梁展文喺2008年新世界中國(917)聘任事件後,久未露面,原來佢前年去咗藥業公司培力(1498)做董事總經理,培力今日公開招股,噚日舉行招股記者會,咁重要嘅日子,梁展文竟然選擇no show!
培力呢個名未必人人聽過,但旗下「農本方」中藥顆粒品牌,可能有唔少人識。呢間港產藥廠2013年請咗梁展文做董事總經理,負責日常業務營運與協調。公司有人私底下同華華講,梁展文做咗幾十年公務員,應該對員工管理好有經驗,係培力請佢嘅最大原因。
一提起梁展文,大家都想起當年佢離開政府後,2008年獲新中聘任為副董事總經理,由於政府喺2004年賣紅灣半島畀新世界發展(017),梁展文係主事官員之一,即刻俾人質疑係延後利益輸送,結果雙方提前解約。
培力招股書提到,梁展文喺2010年至2012年,擔任卓越顧問主席。2011年就有報道指,梁展文任合夥人嘅顧問公司獲新世界母公司周大福任為顧問。可能係培力嘅中藥有料到,令梁展文願意喺前年過檔幫手喇。
empty
噚日培力主席陳宇齡(中)主持招股記者會,梁展文冇現身。