余香凝同廖子妤扮演學生主演電影《非同凡響》噚晚喺圓方舉行慈善首映禮，戲中演員谷祖琳、劉玉翠、葉童及導演歐文傑齊齊現身支持，風雨過後，特首林鄭月娥都前來捧場，劉玉翠、葉童、谷祖琳都有同林鄭握握手。

余香凝戲中素顏演學生妹，朋友睇完都唔認得佢，並指：「感覺幾唔同，變咗冇眉娘，但我接受，當初係我向導演建議做學生唔使化粧，我對自己皮膚有信心，最緊要似個角色，所以聽到人話唔認得我都幾開心。」素顏樣對吸引異性係咪遜一籌，余香凝坦認：「戲中造型應該唔係中學男生喜歡嗰種，似是很乖讀書型，戴有框眼鏡跌到落鼻，又寒背又夾出雙下巴。」話戲中會見到最真實同最靚一面，並笑稱：「當你覺得戲中嘅我都靚嘅話話，應該係好鍾意我，余香凝素顏樣係ok嘅。」

廖子妤則飾演體感較差嘅特殊學生，佢在戲中係一個彩蛋，要花功夫先搵到佢，試鏡時導演想佢宣傳都唔好做，等觀眾睇完先。為此廖子妤穿上校服到特殊學校上課，學習學生動作，連在場家長都以為佢係新同學，大家有良好溝通，仲發現特殊學生中有好多靚女，只係智力同常人有異，所以希望大家不要以貌取人。

精選娛聞，喺晒《娛果》
http://fb.com/appledailyent