華華版最搶眼應該是「中環我至靚」，高登討論區有人每日為「我至靚」評分，甚至有人反拍負責的攝記同事李潤芳（Irene）。今日除夕做個總結，刊登幾張滄海遺珠之外，亦分享Irene過去兩年的獵女心得。

華華：甚麼時間最多靚女在中環出沒？
Irene：早上11點至下午4點最易影到靚女。太早的話，例如9點，好多女仔未化妝、木口木面、睡眼惺忪或面腫眼腫，好難稱得上靚。
華華：那個位置最多靚女，又最容易捕捉到？
Irene：試過在中環中心、國金、滙豐總行、交易廣場對出天橋及娛樂行對出馬路找target，按經驗，娛樂行附近最易影到，途人多，他們亦會停下來等過馬路，可以把握時間影相。
下雨天就通常在交易廣場對出的有蓋天橋找target，女仔在天橋不撐傘，見到正面才影到。雖然國金裏面有好多靚女，但她們似乎多乘地鐵或有車接送，要在公共地方等到靚女走出來的機會較細。

高貴師奶喊報警

華華：困難之處？
Irene：最怕落雨，人人撐傘，見不到靚女正面。其次是離遠望到個target，但被其他途人檔住。或者target不想上鏡，發現我就擰轉面或調頭走。
華華：有冇被人鬧過或要求刪去圖片？
Irene：曾經有位打扮得頗為高貴的中年婦人，誤以為我偷影她懷孕的女兒，死拉着我不放，邊鬧邊喊報警，無奈讓她看看相機裏面的相，她才心息走開。亦有警察好奇走過來問我影誰。兩年間才遇到兩、三宗也不算甚麼。
踏入2013年，華華希望中環更多靚女出沒，亦願意成為「我至靚」啦。

李華華
mailto:[email protected]