香港人撐遮遊行爭取普選，口口聲聲支持2012雙普選嘅葉劉影都冇，陳太又半途去咗恤髮，唔緊要，仲有位話自己年僅8歲半嘅張老太頂住！呢位「太中至尊」好醒神，白色Polo恤襯茶鏡上陣，仲戴住頂煤氣公司太陽帽，搶晒鏡。
八方問佢係唔係煤氣公司職員家屬，同四叔有冇親戚關係？張老太笑嘻嘻咁話，佢嗰頂煤氣帽係唔覺意攞返來嘅。事緣維園有六個足球場，泛民嘅撐普選行動佔咗三個球場，兩個留番俾人踢波，仲剩番一個，用來舉辦機電安全嘉年華，煤氣公司有份協辦，向市民派帽紀念。張老太起初去錯地方，行咗入嘉年華嘅煤氣攤位，求其執番頂帽出返嚟，參加撐普選。