陳美齡今日到灣仔會展出席《我的香港講座》，順道宣傳4月時推出書籍《40個教育改革提案把快樂帶回給香港學生》， 陳美齡現時正在寫自傳，希望趕得上7月書展推出。自傳會由出世開始，橫跨陳美齡61年，回顧經歷有笑有淚，佢話:「喊係諗起爸爸過身時嘅說話，笑係細個買汽水時打爛汽水，以為一定俾媽咪鬧，點知一句都冇鬧過， 因為當時我雙腳已經被玻璃鎅損哂，回望覺得自己係大步檻過。」

早前陳美齡接受內地媒體訪問講解教育子女十個不，網上好多人轉載分享，陳美齡話:「有千幾二千萬人睇，今早睇下facebook亦都有780萬點擊，呢個成績令我覺得好衝擊，我本書內地都有推出， 而家好多內地電視節目搵我做真人騷，分享教育小朋友同女權， 不過就未傾到收入，自己都想試下得唔得，要用普通話演講，家姐都叫我要練習下普通話， 我打算搵老師教。」

陳美玲早前否認任教育局局長，但唔否定會參與公職 ，問到佢現時新發展? 佢話:「探索中 唔係咁簡單，生活上好多問題要顧慮，暫時未有決定，家人有贊成有反對，但最後都要自己決定。身邊好多人俾提議我，要諗清楚自己邊一方面勝任，對香港貢獻未必一定做公職，但若果投身公職，希望係教育。」問到林鄭月娥仲有冇同陳美齡聯絡?陳美齡只搖搖頭示意。