敏妮趁禮拜五少啲嘢做，放咗日假，咁啱契大佬Kenny又放緊大假，所以相約嘆咖啡。
Kenny本身係I.T.人，之前份工經常要返大陸幫啲客搞掂大陸廠房嘅電腦系統，所以識落唔少大陸廠商，佢同敏妮講，識得有個廠佬，經常中港兩邊走，落嚟傾生意之餘，仲喺香港開埋個股票戶口炒股，唔好以為啲大陸人唔識港股，佢哋股輪期指乜都玩，但主力都係買藍籌。
Kenny：「講真百四蚊嘅滙豐點買得落手，點知佢會升到百五蚊！」

敏妮突然諗起，有個阿姨以前經常叫敏妮媽咪返大陸消費，話唔單止買嘢平，啲錢仲好好使，因為100蚊港幣等於百幾蚊人仔。不過，今時唔同往日，美元弱勢，因為聯繫滙率關係，港元同美元掛鈎，相對人民幣嚟講，港元其實貶咗值，家吓100蚊人仔可以換到百幾蚊港幣。大陸人家陣落嚟香港消費就好似當年港人返大陸一樣。
對於大陸股民嚟講，百四蚊港銀嘅滙豐，如果以人民幣計其實唔使百四蚊，呢個就係滙價差異，對股市嘅影響。
好多人估，人民幣仲有好大升值空間，即係人仔購買力越嚟越強，佢哋落嚟香港買「平」資產嘅誘因越嚟越大。正如股王A話，A股同H股差價大，跟港元相對人民幣貶值有好大關係。
諗真啲，除咗相對人仔，港元相對英鎊、歐元都貶值緊，如果大家仲記得，敏妮之前都整咗張用歐元做單位嘅恒指圖，如果用歐元計，恒指仲未創新高。換言之，應該仲可以吸引到投資者炒上。

敏妮見到《蘋果日報》嚟緊呢個禮拜六搞咗個講座，裏面有敏妮好欣賞嘅股評人黃國英做嘉賓，私底下問佢今次會講啲乜，咁啱佢就係講滙市同股市嘅關係，敏妮都打算去聽。唔好話敏妮幫人賣廣告，但正如股王A話，炒股唔可以單睇股市，仲要睇埋滙市、經濟情況，先至勾畫到成幅picture，投資者先可以較理性同客觀嘅判斷。
-講座詳情-
日期：10月13日（星期六）
時間：下午1時30分至4時
地點：富豪九龍酒店
費用：《蘋果日報》報頭1個+$68
着數：其中100位參加者可獲黃國英著作
http://manlitalk.com/blogs/