廖創興九肚山皓朗山莊，又有新搞作。繼上次送地中海之旅後，今次改送更加實際嘅禮品。
即日起至下個月底，買A型大屋，可以獲贈一萬公升汽油。相等於8000支1.25公升汽水嘅容量；3500cc平治房車，可以打爆油缸125次。價值十一萬，相等於樓價嘅0.5%。雖然唔係話好多，但住皓朗，大部份都揸車出入，當係幫補吓都唔錯。
董事衛振聲話，皓朗賣咗22間屋，其中4間屬於大碼，套現3.5億元。重有9大1細，希望可以喺呢兩個月散貨。賣剩嗰啲，明年初改為收租。
廖創興呢排忙緊搬寫字樓，中環廖創興銀行大廈，就快清拆重建，廖銀總部會搬去附近新世界大廈，佢哋已經同新世界簽咗4年租約，明年起租。

股東鍾意郭氏兄弟
新地噚日舉行股東會，傳媒自然唔放過機會，問吓幾位郭生對樓市點睇。
蘭西留意到，現場布置同舊年有啲唔同，房間中央放咗兩部plasma電視機，現場直播新地高層主持股東會嘅過程。
聽講新地咁做，係吸收舊年經驗，有啲坐後排嘅股東，不滿見唔到幾位郭生個樣。
對於「東家（股東）」嘅要求，新地梗係不敢怠慢啦！估唔到原來幾位郭生咁受股東歡迎。