汪詩詩、馬詩慧、張燊悅等今日喺尖沙嘴出席護膚品牌活動,汪詩詩話忙管理老公甄子丹間新電影公司,暑假都唔會同仔女去長途旅行,學緊電影嘢,但唔會寫劇本。
問到會否幫子丹出自傳?詩詩話:「反而想出小朋友書,今朝有人提議出漫畫,可以係英雄人物,中國冇乜代表漫畫,淨係識喜羊羊,所以想出啲嘢令小朋友有興趣。」講到妹妹圓圓婚禮,詩詩話大女鎖咗門、整緊禮物畀阿姨,連佢都唔知係乜。咁神秘?
馬詩慧就話因為屋企得黑白灰色衫,所以著住大女件衫同二女條短褲出席活動,話三母女會交換衫同鞋著,就連囝囝都著爸爸王敏德啲衫:「佢嫌老竇啲衫大,佢鍾意緊身衫,騷佢『所謂嘅』六舊腹肌。」