當年今日
關於我們

便宜漢堡包 - 左丁山

蘋果日報 2006/02/26 00:00


最近有人話,香港麥當勞漢堡包內含嘅膽固醇,與其他國家嘅麥當勞漢堡包相比,全球最高。點解會咁樣?跨國快餐集團嘅方針,第一係市場導向,第二係市場導向,第三仍然係市場導向,如果本地顧客唔喜歡,令到麥當勞冇生意嘅話,佢一定以第一時間,改變漢堡包嘅餡料。澳洲嘅麥當勞,賣多好多綠色蔬菜,理由就係市場導向。
不可不知,香港麥當勞漢堡包可能係全球最便宜嘅,香港人收入高過北京人、台北人,但北京、台北啲麥當勞漢堡包就貴過香港,但同時香港嘅店舖租金亦貴過好多城市喎。鬼佬C最近問左丁山:「點解香港麥當勞最平?香港人工、舖租、燈油火蠟零啥平啲咩?」
呢個問題考起咗左丁山,唔識答,只得求教於人。一位創業投資基金前輩知道答案。據前輩講,香港麥當勞創辦之初,負責管理營運兼持有最多股權嘅DanielNg(伍日照)為人心思縝密,工作勤奮,成日到舖頭外打錶數人頭,充份了解如何爭取人客與及競爭之道,佢做生意係睇長期嘅,唔係睇幾年,於是訂下一個paperthinmargin策略(即係薄利多銷),盡量壓低毛利率,最初有啲人唔明,但後來BurgerKing等對手來港競爭,發覺以低價錢與「先行者」(FirstMover)競爭,根本係自殺行為。最後唯有放棄香港,形成香港只有一家漢堡包店獨大。其他城市就唔同,特許經營權持有人一開始就謀求厚利,於是「市場進入障礙」(marketentrybarrier)就降低晒,麥當勞、BurgerKing、Wendy's並存,爭餐懵,但價錢唔降低,形成非價格競爭模式。
兩個方法,你話邊個好,任揀!伍日照經營之麥當勞,獨霸香港,全無對手,好似好舒服喎。伍日照更舒服,幾年前已經唔做,雲遊四海,做樂團客串指揮,贊助音樂活動。許司長領導嘅西九龍諮詢委員會,最好搵伍日照加入,呢位伍先生識經營,識文化,係十足十國際人,加入西九諮委會,一定有貢獻。