港股今年6月中由15200點附近反覆升到噚日最高17940點，累升逾2700點，升幅18%。同期和黃（013）由68蚊低位反彈，最高唔過75蚊，噚日收報68.85元，升45仙；由6月低位計，升咗1.25%。小股東一殼眼淚。
喺「香港討論區」內，網友dannyleo問：「13號和黃係咪唔識再升？」
艇民gyn_man呻：「我之前$72買咗一手，到現在坐艇中，真係心淡。」
另一艇民COCOWOO亦大呼：「我仲慘，$74入，都唔知走唔走，佢一路係咁跌……執咗佢$2000息都死」
#sausau#亦係高位上車：「我74蚊買，見到佢我就激氣，大升冇佢份，大跌佢又有份，真係一言難盡。」
尹天照寄語各股民：「13勢必做明燈，如果連佢都升，大市好快插。」

大行唱好一樣跌

歐洲3G業務係和黃近年最大包袱，雖然其他業務表現出色，都唔可以減輕投資者嘅憂慮。睇估值，和黃其實好抵買，上個月有4間外資大行出報告評論和黃，其中3間睇好，目標價83至86元，另一間高盛則給予「中立」評級，目標價80蚊。雖然有大行報告護航，但係和黃股價反而愈唱愈跌。
和黃舊年8月由83.05元高位回落，反彈浪頂一個低過一個，圖表上出現一個好大嘅頂部形態。此外，今年6月中至今，似係營造頭肩頂，頸線喺68蚊左右，呢個位一旦失守，將會引發一輪技術沽盤，樂觀啲睇，起碼要試63蚊，下一級支持位係58蚊，短線反彈阻力71蚊。
余文