我求大俠一向大波癮，前晚歐聯分組賽開鑼，當然揸住個收費電視遙控係咁㩒，睇吓英超同西甲兩支班霸曼聯同巴塞隆拿可唔可以反彈；結果曼聯彈唔起，而巴塞隆拿極速大反彈，主場5:1痛宰彭拿典奈高斯，梅開二度嘅美斯，更加取代李華度成為球隊歐聯入球紀錄保持者。
巴塞上仗輸畀西甲升班馬靴高斯，後者嘅查斯古特搞到巴塞門前風聲鶴唳，似乎法國前鋒真係巴塞剋星；今仗彭拿典嘅法國前鋒高禾，接應同胞施斯嘅頭槌二傳，20分鐘射破主隊大門。好彩巴塞擁躉都唔使擔心好耐，2分鐘後美斯接應沙維妙傳單刀射入，即刻追成1:1；上半場前，韋拿同美斯建功，巴塞已經反超前3:1。

美斯入兩球趕過李華度

美斯呢位世界足球先生，原本下半場有機會再有進賬，不過佢主射12碼就畀對手門將迪佐華斯接實；冇機會演帽子戲法，美斯轉形助攻，受惠嘅係柏度洛迪古斯同丹尼爾，最後巴塞5:1大勝，打響D組頭炮，亦一吐上仗輸波烏氣。賽前美斯同巴西前鋒李華度，以25球並列球隊歐聯入球紀錄保持者，今次一口氣入兩球，美斯可以獨霸呢個紀錄。美斯賽後話：「我射失12碼都有啲唔開心，好彩球隊最終贏波，我都有兩球進賬。」
人紅自然沒法擋，美斯噚日就馬不停蹄，由巴塞隆拿坐飛機去到英國倫敦，然後再轉直升機去一個神秘球場，出席由體育用品「三間」搞嘅新波砵宣傳會，仲同當地幾位年輕球員組隊挑戰，等佢哋感受一吓美斯嘅盤球速度。不過我求大俠就勸美斯小心啲唔好受傷，事關下周日巴塞就要作客馬德里體育會，巴塞唔想連續兩場聯賽失分，就要靠晒美斯o架！