【新增圖片】

係人都想好事成雙，練馬師告東尼於平安夜61歲生日前夕，今午（23日）在沙田馬場臨尾發威，由潘頓贏完第九場大熱「時時精綵」，於最尾第十場三班1400米以沈拿操刀的「加州再豫」爆冷食埋尾糊起孖。「加州再豫」單Win及組合獨贏A3分別派115及31.5元。

昔日做過馬會超新星的「加州再豫」，季內原本逢出例輸，但呢次騎師一換上沈拿，卻大發神威，沿途守第五位，後上僅僅氣走半冷馬「勝利專家」，險勝一頭位，亦是騎練沈拿、告東尼歷來首度合作即勝。「加州再豫」打開本身今季勝門，同時成為今年沙田賽事最後一匹頭馬。

原籍意大利的沈拿，上季尾首戰香江，客串期埋單勝出告達理（外號大告）馬房「勝利寶石」及「快樂火龍」兩Win，今日沈拿先憑第二場同屬大告的「包勝」敲響重臨客串勝鼓，然後在尾場以大告細佬告東尼的「加州再豫」爆冷添食，個人在港第一次一日兩捷。

告東尼今午起孖的「時時精綵」及「加州再豫」，都是近仗曾由徒弟蔡明紹操刀搏輸跑位置，結果換人收場，這天分別在潘頓及沈拿胯下建功。連同今日在內，告東尼近六場頭馬都冇蔡明紹份。

第十場二至四名依次為「勝利專家」、「白鷺飛翔」及「孟買之星」，四重彩派八萬一千幾。