改革醫委會修訂條例草案今繼續於立會審議，食物及衞生局局長高永文早前企硬草案不涉政治，但幾日後情況急轉，「奶媽」政務司司長林鄭月娥變身雷霆救兵會見各黨派，有議員私下揶揄，高永文已由高民望，淪為「吳得掂第二」，而林鄭如此勇猛更令議員覺得她正積極累積選特首本錢。
有立會議員說上周審改革草案流會，泛民由支持變反對、建制「懶懶閒」冇死守，「盲嘅都睇到成件事已經政治化」，但高不明政治問題，政治解決原則，上周六出席電台節目還在說「我唔係一個搞政治嘅人」，有議員聽完他這番說話，大搖其頭說：「真係唔知佢（高永文）係咪想草案唔好過？佢班政助常秘有冇做嘢？」

林鄭插手　政治解決

有官場中人私下說，其實政府夠票通過，「只要同建制派講掂數留守、泛民唔好拉布、唔好走咗去已搞掂」，不明高為何堅持要與政黨對着幹，另一議員則說林鄭插手後就是用政治方法解決，「林鄭噚日態度好簡單，一方面說服建制派留守、另一方面叫泛民畀條路行，唔好火上加油」，不論泛民及建制，對林鄭處理手法明顯更加受落。
有泛民議員更直言，今次林鄭將改革醫委會條例草案「攬上身」，又分別見泛民及建制議員，無非要顯示她的拆彈能力，可以與兩大陣營有偈傾，「左睇右睇林鄭完全唔似諗住退休，佢咁勇猛為乜？怕且唔使畫公仔畫出腸」。

季陶
周一、三、五刊出