利物浦中堅洛夫雲成日被批評喺後面好似一舊雲咁，但原來有苦衷，佢近日受訪講到自己受傷痛困擾多時，呢幾周賽前都要啪止痛藥先可以頂硬上。

洛夫雲話要食五粒止痛藥先可以比賽：「我近兩個禮拜全身都出現問題，好似背部，而家下連我個腳踭都傷埋。我可以比賽，但有時都冇參與全部操練，尤其背傷最麻煩，所以之前鬥曼城同般尼兩場波都冇踢。如果要上陣，賽前就要食五粒止痛藥先得。」

周日英超對完紐卡素後，洛夫雲又要回到克羅地亞報到，為國家隊出戰兩場關鍵嘅世盃外圍賽，對手分別係芬蘭同烏克蘭。不過，呢位紅軍中堅就話唔知可唔可以披甲，仲話一早已匯報自己嘅傷勢畀教練卡錫斯聽，但對方仲堅持要召佢入隊。大家應該記得，洛夫雲去年就係因為唔妥呢位教練，最終落選2016歐國盃大軍名單，睇嚟真係心繫紅軍多過克羅地亞。