【李八方online】政府起勢DQ 最年輕議員兩年換3人
區諾軒李八方立法會
區諾軒係現時立法會最年輕嘅議員,唔知其後嘅補選當選人,會唔會後生過佢?李錦鏵攝
四位經補選晉身立法會嘅議員星期三正式宣誓就任,立法會同日亦出咗新一份「有關立法會的數字」,八方發現四個人加入後都有啲有趣變化,好似區諾軒以30歲之齡,力壓現年33歲嘅工聯會何啟明,成為現時立法會最年輕議員,同時由於區諾軒、范國威同鄭泳舜都係區議員,今屆雙料議員亦增加到25個。
八方留意到,立法會每隔幾個月就會有一份「有關立法會的數字」嘅研究,由於四個補選議員近日履新,令唔少數字比上一期、即係兩個月之前有變化。好似區諾軒係現時立法會最年輕議員,至於最老嘅仍然係現年73歲嘅石禮謙。四個補選議員都係男性,令男議員人數增加到58人,女議員維持喺10個。
由於謝偉詮同范國威都係前議員,初次擔任立法會議員嘅人數就由21個增加到23個。而區諾軒、范國威同鄭泳舜都係區議員,今屆雙料議員人數亦增至25個。老實講,上屆立法會「有關立法會的數字」四年內都唔會有太大變化,但今屆政府起勢DQ議員,最年輕議員個位,兩年內換咗三次(羅冠聰、何啟明、區諾軒),嚟緊可能又再補選,唔知會唔會再有新發現?