康仔當初決定入行做Speed Dating，其中一個原因就係諗住近水樓台，識多啲女。所以每次event之前，我都好勤力check定個name list，然後再「地毯式」搜索公司個database，絕對唔容許有任何索女逃得出我法眼。

直至到上個月嘅一個三十人event，康仔就發現咗兩位好生面口嘅女仔客，正想上前問吓佢哋係乜水，就畀同事Katie㩒住。

「康仔，佢兩個係老細啲friend嚟，做媒㗎！」

聽返Katie講，原來佢兩個係鐵腳嚟，幫老細做媒都做咗五、六次，怪唔之得呢兩位姐仔咁與別不同，全晚淨係食嘢嗰part有笑容，其餘時間同死魚冇分別。

正所謂無商不奸，搵人做媒喺呢行已經唔係新鮮事。康仔就極度討厭呢個文化，畢竟啲客係真金白銀畀錢想搵段姻緣，咁做法同買餸呃秤冇分別。咁點解要搵人做媒呢？一來係要男、女出席人數對稱，二來係驚太少人，要充撐吓場面。以康仔間公司為例，大型event梗有兩、三個媒，細型嘅就間中有一、兩個。

可以呃餐飯食，又可以識吓女，做媒聽落係一份優差，不過難聽啲講句，做媒係「有得睇冇得食」，因為部分極速約會公司都會禁止個媒同客仔交換contact，咁個客先會繼續畀錢join落去。

而呢啲媒，九成係搞手或者職員信得過嘅朋友，唔熟嘅人驚你會爆響口，影響到間公司嘅聲譽。至於做媒嘅首要條件，就係唔可以靚仔、靚女，因為若果外貌太出眾，其他客就會比下去，仲邊會有人睬佢吖！

專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。

Facebook專頁：
https://www.facebook.com/mynameishonghong/