股壇長毛DavidWebb鬧人真係停不了！呢頭插完華潤系，噚日都要喺年尾前再出擊，今次，佢話上市公司派送紅股同拆細股份其實係無意思（pointless）！
長毛話，上市公司派紅股兼幫股份拆細，小股民以為可以幫到股票增值，個人賬戶因為多咗股數就等於收利是，不過，呢啲做法多數係噱頭嘢啫，甚至有誤導股民之嫌！
點解呀？佢話，派紅股牽涉發行紅股嘅成本，好似出公告、列印文件、召開股東會等等，理論上股份價值維持不變，而事實上扣除成本之後，上市公司本身同股東會有輕微嘅損失；紅股可能產生碎股問題，持貨量低嘅散戶，通常唔可以湊足一手，喺沽出碎股嗰陣，就會被迫以低於市價賣股；紅股部份就要等派送日先可以喺市場流通買賣；除淨之後，投資者通常難對比股份過往派息；加上除淨效應，導致股價調整，股份最低買賣價差比例更加可能擴大，令股價波動……

點名批評8上市公司

今次「有幸」俾長毛「金榜題名」嘅，有信利（732）、志高（449）、時富（510）、莎莎（178）、冠亞商業（104）、恒芯（8046）、中國龍工（3339）同埋濰柴動力（2338）。其中，諗住出年初派紅股兼拆細嘅信利俾佢插得最應，長毛直頭用「Trulyconfusing（真係好混亂）」嚟形容番Truly（即係信利），絕！
咁長毛有咩好提議先？佢話若果要股民真正受惠，上市公司應該派發現金股息、提高公司營運質素……咁又係呀，親生仔不如近身錢，送禮物又不如折現，華華都贊成派cash！

李華華
mailto:[email protected]