當年今日
關於我們

【兩度大步檻過】黑妹李麗霞三年動三次手術 上週再捱一刀:再咁樣真係頂唔順

蘋果日報 2020/06/09 07:00

黑妹走出鬼門關娛樂李麗霞娛樂

去年在大台劇《牛下女高音》飾演「興哥」的59歲「黑妹」李麗霞,堪稱火鳳凰。廿多歲時遇過火燒意外,燒著半邊身,到03年又被滾湯淥傷手臂,要住院一個月。

最近三年,她更兩度走過鬼門關,動了兩次大手術,包括17年切走頸嘅4cm腫瘤,及19年發現患肺癌,可幸都能大步檻過。上週她又再度入院做手術,並在facebook留言:「即使我幾硬淨都好,都有頂唔順嘅時候。」

原來因頸椎問題,上週入院再捱一刀,事後本刊致電已返家休養的黑妹姐,對於三年來多次進出醫院,她不禁說:「再咁樣我自己都頂唔順。」
empty
拍罷《牛下女高音》,黑妹姐身體感到不悉,幸而立即做身體檢查發現肺患,一早就醫。
empty
去年大病初癒,上週又再入院動手術,59歲的黑妹姐在facebook表心跡,坦言幾堅強,面對疾病折騰,感到難以承受。
拍《牛下》忍痛開工
一個人擔起頭家,獨力養大女兒的黑妹姐出名硬淨,18年底她拍罷《牛下女高音》,未幾感身體不適去做身體檢查,得悉患上初期肺癌,幸因及早發現,切除肺葉就無事。但之後又開始受頸椎痛楚困擾,強忍年多,頸痛加劇令她不得不再一次走入手術室。「2017年到依家,做咗三次手術。17年12月,突然手腳麻痺 ,無晒知覺,發現頸部生咗一個4CM腫瘤要即刻做手術。19年,又覺得全身唔舒服,之後發現肺部有腫瘤。我心諗,年半之間要做兩次手術,好感恩好開心,因為係肺癌只係早期,切除肺葉就可以。

而今次係骨之骨之間榻下,流失咗啫喱組織,壓著我啲神經,導致我經常頭暈,又有神經線痛,困擾咗我年幾兩年,所以個手術係幫我要撐番開頸骨。」雖然手術後聲音帶點沙啞,但中氣十足。
empty
拍罷《牛下女高音》,黑妹姐身體感到不悉,幸而立即做身體檢查發現肺患,一早就醫。
大病初癒再動手術傷元氣
她坦言,去年切除肺葉,大病初癒,近日又再接受另一次手術,元氣大傷。

她說「身體真係一年比一年差啲,你知道麻醉藥始終對身體唔係太好,今次麻醉完,喺手術室出返嚟,感覺好辛苦。雖然今次手術只做咗兩、三個小時,但與之前相比,辛苦好多,真係好慘,再咁樣我自己都頂唔順,哈哈,死咁滯!依家我條頸骨與骨之間,第五與六節間放咗一個金屬盒撐住。」
empty
三年做了三次手術,其中去年為肺癌初期,切了肺葉保命,大步檻過。
近年做運動打定底
三年三個難關,好在一切上天早有預備。

「我以前零運動。不過自從去年一個大手術後,我開始跟朋友行山打golf,亦好彩開始做下運動,否則呢次對我嚟講幾難捱,唔知負唔負荷到。

可幸她樂觀的性格是良藥,所以就算多辛苦,你依然聽到黑妹姐笑著面對。「我自己都頂唔順,哈哈哈!」、「依家疫情兼休養,無得登台工作,坐喺屋企食穀種,哈哈哈!」
empty
樂觀是良藥,加上近年開始行山做運動,她說想不到為這一次手術,做了一個好的準備,否則身體負荷不了。
工作狂終於覺醒
過往幾十年只顧拚命賺錢,登台、拍劇、經營餐廳,身兼三瓣,積勞成疾,直至賠上健康,令這位工作狂明白,甚麼才是最重要。頸有金屬撐住,「硬頸」的黑妹姐,反而不再硬頸。

「啲生意無做,全部取消晒,自從做咗幾個手術,再無迫自己不停工作,好多嘢放放放,放低咗一啲,個人開心咗好多,至少無咁多壓力,我希望呢個病康復後,再繼續運動keep住身體。」不再拿健康作賭本,只因59歲的她,更珍惜與女兒及孫仔的相聚。
那場病因禍得福
病,令這個工作狂煞制,她現在才知道因禍得福。

「我睇得好開,認識我嘅人都知我好樂觀,呢段時間既然想做都冇得做,不如好好享受親子時間,我個女好開心,依家我定時定候去探孫,一場病改變咗我好多,連脾氣都收歛好多,哈哈!」奔波勞碌多年,現在不妨享受放緩腳步的時光,壹仔在此祝黑妹姐早日康復。
empty
一場病,反而因禍得福,令工作狂的她甘願放低工作,善待自己,與女兒孫子享受天倫樂,享受生活。
----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!