香港有個都市傳說，就係以前考政務官，最後一個考試試題，就係問一旦香港發生大型突發事故，例如紅磡海底隧道穿左個窿，啲水湧入管道，佢作為政務官會點樣執生？

根據同一傳說，因為華人考生去到呢一關嘅時候，冇model answer去死背，合格率非常之低。因不合乎當時港情，所以英國佬最後一炮過取消呢一關。

呢個傳說是否屬實，真係唔知。不過又一次發生鞏固呢個傳說流傳力嘅事件。

今次打風，冇死人。爭端最大，就係第日返工嘅安排。邊個應該返，邊個唔應該。

首先，孫柏文好希望本報記者，追晒所有因今日員工遲到罰人嘅僱主。呢隻故仔會非常有趣。我喺度諗，如果係以前殖民地政府。真係一個電話俾所有行會啲大孖沙成員，銀行、交易所、寫字樓，應該都好快會有執生方案。

再講，香港咁多年來，被中央派港人士領導，搞到我鬥你，你鬥我。其中一個後果，就係當天災發生時，冇咗殖民時代嘅社區通訊網絡。即政府啲官，同社區人士，有足夠嘅人際關係，叫人「拍硬檔，幫幫手」。

當然，呢個就係英式民間主導，同法式(共產政權們承繼）乜叉都要「國家」做晒嘅分別。

我亦希望，從今開始，所有BBA 課程，教人力資源管理時，教埋點處理返唔到工嘅情況。叫林鄭月娥做奶媽，唔通真係個個未戒奶，屎尿都唔識自己搞掂，吓吓要政府？

最後，俄鋁(486)最新消息係，制裁已名存實亡。應該有得繼續升。

孫柏文

全球樓行 Dream House零距離
https://hk.feature.appledaily.com/overseasproperty