政府前排公佈咗3月11日會就首輪DQ案中，3個地區直選同一個功能議席進行立法會補選，建制陣營就一早協調好晒，為咗搶議席每區只係派1個人落場，之但係民主派就麻煩好多，雖然幾個主流民主派陣營有共識，會讓路畀DQ議員先選，但八方估唔到連DQ議員之間都可以爭出選！好似青年新政九西DQ議員游蕙禎噚日就喺fb發文，叫另一被DQ嘅九西議員劉小麗讓路，畀青政參加補選先，亦令政界猜測游BB係咪想再選立會？

「小麗老師一定大局為重」

之前傳正為DQ案上訴嘅小麗，或者參加3月補選，民主派亦會優先畀佢選，不過游BB噚日喺fb留言話，佢相信佢哋呢邊會有人參加補選，如果根據今次補選原則，「小麗老師都一定會深明大義大局為重讓路嘅」，言下之意係叫小麗讓路畀青政？
咁青政係咪打算搵人出戰九西？定係佢自己選？游BB就同八方解釋，佢嘅意思並唔係話青政有優先參選權，而係佢近日聽到有啲同青政光譜接近嘅人考慮緊出選，既然呢次補選嘅議席係因為佢被DQ而出現，所以應該同佢哋同一光譜嘅人有優先參選權箒。
雖然游BB話暫時仲未有明確嘅人選，但確實本土派內係有人有意思，當然佢亦要睇吓佢哋提出乜主張先啦！既然拋得出建議，游BB話會盡量同其他民主派人士傾傾，咁小麗必然係其中一個啦！八方都搵過小麗，想問佢肯唔肯讓路，不過到截稿前就未有回音。

李八方