現年26歲嘅韓國女星申世京，於1998年以8歲之齡成為韓國搖滾教父徐太志個人專輯《Take 5》封面女孩，從而出道，曾演出唔少劇集包括《樹大根深》、《看見味道的少女》、《六龍飛天》，最新作就有下周一首播嘅tvN新劇《河伯的新娘2017》。

今年係徐太志推出嘅組合「徐太志和孩子們」出道25周年，徐太志近日籌備特別計劃慶祝出道25周年，以「時空旅行者」做主題，所以佢再次搵返申世京拍攝海報，重演當年嘅專輯封面，徐太志更將兩張相上載到官方網站，當中設計、色調、配字都相同，除咗勾起樂迷回憶之外，申世京變化不大嘅外貌亦引起關注。