早於今年2月已揚言細價樓會爆煲的紀惠集團行政總裁湯文亮，在發表此言論之前一個月，其女兒湯振玲卻首次置業，一擲約8,570萬元連掃大潭老牌豪宅紅山半島4個單位，由父親資助一半首期，成為「超級首置客」。

湯振玲直言買入單位投資，因為豪宅呎價竟與細價樓接近，才一嚐做業主滋味。

當年以拔尖生身份考入科大王牌環球商業管理的高材生湯振玲，雖然生於富裕家庭，但未有早早買樓，於30歲才作人生首個買樓決定。湯振玲道出真正想買樓的心態，指早於兩、三年前已開始想買樓兼有去睇樓，但一直無合適單位兼無急切性需要。

直到紅山半島在今年1月重推，實用呎價2.1萬元，「做過分析，嗰排沙田第一城呎價已經1.6萬，紅山半島雖然舊，但有全新裝修，嗰時覺得豪宅同細價樓冇可能相差咁少。一係細價樓太貴、一係豪宅低水，所以先覺得抵，同埋又近自己屋企（陽明山莊）先入市」。

「初時打算買兩個大單位，但考慮過大單位自己日後未必用得晒，如果收租又未必有細單位咁收租，所以先一次過買4個較細單位」。湯振玲買入為3座中層A、B室及同座頂層A、B室，面積合共4,076方呎，利用首次買樓資格，更付少360萬元印花稅。

一次過斥巨資買樓，湯振玲坦言都要由父母資助首期，「畀一半首期（即近4,300萬元），自己出一半、屋企出另一半，因為知道爸爸錫仔女點都會畀啲」。由於家族一向投資開物業，認為長線收租較穩陣，所以將資金都放入磚頭。「買樓收租當儲下錢，日後有機會自用，而家4個單位全部租出，月租夾埋有22萬，畀完按揭仲有錢落袋」。

曾在大學時期在連鎖咖啡店做侍應、畢業後在投資銀行打兩年工後才返回紀惠集團打理家族生意，湯振玲坦言知道在社會工作數年，都難以買樓。

一直與父母同住的湯振玲認為，樓價太高之下，與家人同住，既可享受家庭生活，又可儲到錢。「如果家庭環境許可，都盡量同屋企人住，年輕人唔一定要搬出去住追求個人空間」。

湯文亮則支持父母資助子女第一層自住物業的首期，「唔係話一定要靠父母，而係樓市政策影響，例如按揭收緊，子女獨力難以支撐」。不過，他認為父母只可以負擔一部份首期，並非將首期全數送給子女。

「如果首期200萬，父母最多可以畀100萬，其他由子女自己負責番。因為起碼畀父母見到，子女有能力儲到100萬，唔怕日後供唔到樓」。湯文亮擔心如將整個首期送給子女，他們會不珍惜，亦有可能根本沒有儲蓄習慣，每月難有固定餘款供樓。

記者:程俊華