當年今日
關於我們

【韓流】果然識嘆!BIGBANG坐私人遊艇去澳門

蘋果日報 2015/10/23 06:00

澳門蘋果香港韓國BIGBANG即時私人遊艇

韓國天團BIGBANG今晚就會去到澳門舉行一連三日演唱會,噚晚靜雞雞喺香港玩咗晚嘅隊長G-DRAGON(GD)、成員勝利、T.O.P,同噚日冇出去玩嘅太陽今日就齊齊喺香港出發過大海,而剛剛成員都各自有喺Instagram晒相曝露行蹤。

相中,只見四子疑似坐住一架私人遊艇出發,勝利就先公開一張GD坐喺船頭望海chok到爆嘅相,仲搞趕笑留言話:「去澳門嘅路上見到藝人。」

而GD就公開一張藍天白雲、一張影住自己幅超,仲有一張太陽瞓喺船身玩手機嘅相,GD仲喺太陽幅相度留言話:「一邊睇住自己upload嘅相一邊甜笑嘅變態太陽。」無耐又要放多兩張勝利嘅相,仲留言話:「有個普通人成日都影我。」、「所以我都影返佢。」

太陽就公開一條短片影住自己坐船個樣,仲有一張偷拍GD遮住自己個樣休息嘅相。

至於平時一日起碼放廿張相上Instagram嘅T.O.P,今日就異常地一張相都冇放。