當年今日
關於我們

【李八方online】岳少補選用250萬多過阿鼎近百萬? 

蘋果日報 2016/05/01 06:00

李八方ONLINE楊岳橋新界東補選

新界東補選嘅候選人陸續向選舉事務處提交開支申報,以逾萬票敗於公民黨楊岳橋嘅民建聯周浩鼎搶閘交咗,佢用咗161萬搞補選,以佢拎到15萬票計,換言之每票值11蚊;由於輸咗,點計肯定都係冇乜效益,好在有民建聯幫佢包底。咁以逾16萬票勝出嘅岳少,又洗咗幾多錢?八方聽聞,岳少選舉開支約250萬,即係貼近呢次補選開支嘅近262萬上限,即係每票約值逾15.6蚊。

點解會洗多過阿鼎成百萬?有公民黨中人話,洗錢多梗係事出有因,皆因岳少有嘅競選活動,對手未必有搞,例如維園年宵檔嘅宣傳,已經用咗13萬;更重要嘅因素就係初一發生旺角騷亂後,成個補選形勢逆轉,岳少嘅競選工程要急急改主題,應付當時四方八面嘅抹黑攻勢(相信大家都記得,當時岳少因為向騷亂被捕者提供法律支援,而被喻為『暴民律師』,唔多渠道澄清下又點得?)

撇除呢兩項,最大條數係選舉廣告,約152萬。