內地客藉自由行嚟香港買樓,近日成為熱門話題,其實,以往都有唔少內地客買香港樓嘅例子。
聽經絡集團行政總裁黃錦康講,銀行承造內地客樓按,條件與港客大致相若,主要係買家要出示內地工作證明、稅單同護照;最大分別係申請人要有港人做擔保。
至於承造按揭,最高係七成,利率可達優惠利率(P)減二點六厘。不過,一定要用港元還款。
黃錦康透露,山頂加列山道早排有一宗三千幾萬銀嘅成交,買家係內地商家,喺香港有生意,以個人名義買入單位,向銀行借七成,供十年,利率低至全期P減二點六二五厘,同一手樓睇齊。
聽講呢啲內地買家,好多喺香港有生意,選擇嘅單位就一手同二手都有。
另外,經絡集團較早前設立「自由行按揭專組」,並夥拍銀行提供度身訂做樓按產品,聽講市場反應唔錯,接到好多查詢,已經處理緊。
鍾士元廿四孝買樓贈子女
市道是否好轉,雖然話見仁見智,但睇見唔少知名人士相繼入市,相信佢哋嘅眼光都唔會差得去邊。
喺政壇有崇高地位嘅鍾士元爵士,日前以四百萬買入何文田豪宅麗豪閣高層單位,面積一千呎,三房連套房,望加多利山翠綠景致,四千蚊一呎,聽講話買畀仔女住。
雖然麗豪閣唔係近期熱銷嘅新盤,勝在坐落喺九龍傳統豪宅區,旺中帶靜,區內物業不但可以保值,重有投資價值,而且亦有不少社會名人聚居。
樓盤由香港興業持有,喺窩打老道九十四至九十六號,啱啱翻新完,現正委託美聯物業發售。