當年今日
關於我們

碧咸,踢右中場無你份!

蘋果日報 2006/05/27 08:00


碧咸漸被人遺棄

adidas找來雷拿、雲邦美、基維爾、尼斯達、拿臣、施斯、簡尼、謝拉特、魯爾、施丹、卡卡及碧咸等12位球星玩+10,半數人選巴西卡富踢右中場,另一票王是球王施丹,今次是他最後一次踢世界盃,不是敬老確實好波,就連雲巴士頓、馬勒當拿都有人選,碧咸無一個球星肯撐!只怪他過檔皇馬後沒甚麼新突破,香蕉罰球時Work時唔Work,又經常射失12碼,專一形象又Totallost,連僅餘的好男人條件都無埋,Fans唔Out至怪,唉!你還是專心踢波吧。

下集廣告網上有得睇

adidas+10廣告分上下兩集Equipo及Partido,各長60秒,由廣告界知名導演IvanZacharias執導,上集現正播放,下集將在月尾播出,現在可在adidas網站率先收看。下集兩位小朋友Pedro和Jose兩隊正式對壘,兩人顯大將之風對球星指指點點,搞笑場面多籮籮,這邊廂卡卡因窩利射門被迪科雙腳擋出,被Jose調走換入杜夫,那邊廂林柏特回贈一腳窩利被簡尼撲下,正當大家爭議皮球有否射入白界線之際,Jose媽媽一句:「食飯啦。」球賽即時結束,眾球星被Jose玩到陀陀擰。除下集可以率先看,adidas網站亦提供各球星的牆紙供大家下載,你更可以玩+10遊戲,輸入你所選的10位球員,登記後你便有機會免費飛去德國睇世界盃,在網上亦有很多未在香港電視曝光的廣告及球星訪問,大家不妨上網八一八。(網址: http://www.adidas.com)

丘建威都Out碧咸

非偏見,以波論波,丘建威都Out碧咸:「中場好多人可以揀,唔需要揀碧咸,佢弱在無個人突破能力,踢波好現實,好波自然多人爭,我都有留意到adidas嗰12位球星嘅+10選擇,施丹嘅陣容選龍門巴夫斯、李沙拉素同杜林踢後、中場揀馬基里尼,全部都係98世界盃法國隊球員,證明佢好懷念98捧盃的日子。」

球迷揀ImpossibleTeam

近年碧咸狀態下滑又多緋聞,女球迷再不膚淺,無話靚仔就一定Buy!做街訪,男女球迷心目中的+10組合都極有創意,有人選戴志偉、三杉淳,亦有人選女子足球小姐MiaHamm,這才是真真正正的ImpossibleTeam。