七月一日回歸六周年反廿三條大遊行，五十萬人出席，沒有貪便宜湧去換戲票和換領一世食唔晒的白米與咖啡，這確實出乎政府意料之外。董班子那批謀臣唔明白，平日怕執輸的香港人，竟然甘心蝕底，假期人逼人大汗沓細汗馬拉松式去行街？不可思議，肯定有蹊蹺。
董家班很快會提議，成立獨立調查委員會，徹查0371大遊行風波。而調查委員會的主席，理所當然由遊行隊伍抗議橫額中最標青的風雲人物的董特首充當。
雖然有人私底下叫董先生食自己，但明眼人都知，董先生冇咁開胃，不會食自己，只會查自己。查來查去，查了廿三次後，對記者有點反應了，是時候回答了。

咁呵，遊行人數五十萬，他們舉起我那張大相，相當粗糙、衰格。但不可不知，張相是經過電腦加工，我本人可以發誓，我不會這樣食撻。我老婆雖然嚕囌，但從未試過這樣質我食撻，那隻手，也不似1A喎。唔，下次叫遊行人士別掉以輕心，別受誤導，揀過張似樣些少的相……尊重肖像權，發揮創意，呵。
查實，葉太個樣都唔曳，我鍾意佢着貼身casualwear襯阿嬸look雨膠頭笠，青春迫人，七月九日，反廿三條人士舉她的大頭相，就更好……質佢食乜好？你問我呵？
董先生擺擺像兩梳蕉的手，含笑轉身離去。