外表斯斯文文的阿玉,給人乖乖女、甜姐兒的感覺,從沒想過這位看來弱質纖纖的小女孩,原來是一位生命鬥士。「最差嘅時候,我試過喺ICU(深切治療部)住咗十一日,全身插滿晒喉,不過,我話畀自己聽,我一定要捱過去,一來唔可以讓屋企人擔心,二來我重未入大學,未完成夢想,唔可以有乜差池。」說起在鬼門關繞過一圈的經歷,阿玉猶有餘悸。
手術留後遺症
現年二十歲的阿玉,以往身體一向健康,可是中六那年,她經常感到頭痛、暈眩,嚴重時更會嘔吐,一直埋首學業的阿玉,還以為是感冒作祟,未有放在心頭,直至其後情況愈來愈嚴重,眼睛並不時出現叠影,阿玉才急忙入院檢查,結果聽到一個令人震驚的噩耗。「醫生話我腦裏面有個腫瘤,而且有腦積水,要即刻做手術。」雖然手術成功,而該腫瘤亦證實屬良性,惟帶給阿玉的後遺症仍然很多。
阿玉表示:「其實個瘤都冇切晒,因為有部份太過貼近腦神經,𠵱家個瘤重壓住我嘅視覺神經,令我嘅視野縮窄咗好多,得番一半左右;另外,因為之前瞓得醫院太耐,手腳都冇以前咁靈活,要做物理治療。」
經歷一場大病,雖然令阿玉的視力受到永久損害,但心扉卻敞開了。「經過今次,我真真正正體會到親情嘅可貴;另外,我喺留醫期間,亦得到好多啟發,除咗有嚟自義工嘅鼓勵之外,最令我感受深刻嘅,係見到一個有糖尿病嘅婆婆,佢連手都切埋,但依然可以好開心咁生活。我就同自己講,婆婆都可以咁樂觀去面對逆境,點解我唔可以?」