咁啱耀才最近宣佈,星期日(本月21日)喺銅鑼灣一間戲院包場請客睇戲,佢哋喺新聞稿度話,今年係「千挑萬選」揀中《賭城風雲3》呢齣賀歲片,認真令人O晒嘴。華華噚日搵葉茂林問個究竟,佢顯得一頭霧水,好似真係唔知有網民發起罷睇行動。
佢解釋,揀呢齣戲純粹因為故仔同賭有關,覺得適合買賣股票嘅客仔去睇,而且戲中有多位本港紅星,周潤發又肯定有號召力,總之佢都係想客人睇得開心㗎啫,冇諗過導演係唔係王晶。講講吓,佢仲反問咗句:「我係咪揀錯咗?」
耀才早前更換公司logo顏色,由前棗紅色改為橙色,葉老闆仲話想藉此飛甩老土形象,吸引多啲年輕客戶,𠵱家網民多數係年輕人,所以話呢,葉老闆問係咪揀錯咗,答案要由佢自己諗喇。佢哋就預咗呢次請睇戲活動要花費接近50萬元。
李華華
mailto:
[email protected]