經紀Ｋ打電話嚟，約去上海睇F1大賽車（十月十五、十六日），招呼一切咁講，左丁山為之受寵若驚。與經紀Ｋ認識二十年，生意往來甚少，而證券行招呼他人參加體育盛事如世界盃、七人欖球賽、F1大賽車等等，一定係招呼生意大客；經紀Ｋ竟然搵埋左丁山去，真係盛情可感。可惜吖，走唔郁，去唔成，惟有心領，向經紀Ｋ講幾十句多謝。經紀Ｋ間證券行在台灣嘅生意十分好，到時可能有唔少台灣基金經理一齊到上海睇大賽車。
與經紀Ｋ傾開，問佢生活如何，佢話住在山頂舊廈，本來十分舒服，但今年六月、八月大雨特多，舊樓不堪雨打，外牆漏水頻頻，搞到佢不勝其煩。兩年前佢已經全面翻新裝修防漏，而今知道白費心機。

記者小Ｇ識得一位監督工程師，專做驗樓維修工夫，小Ｇ問過呢位專家關於驗收舊樓嘅問題。專家話：「香港啲舊樓，凡樓齡在二十年以上，一定有窗門漏水、外牆滲水、廁所浴室漏水嘅毛病，十居其九，暗病滿屋。我哋做驗樓，根本冇法子認真，因為樓市暢旺之時，業主好唔耐煩，譬如Ｇ小姐你買樓，搵我去驗收，賣家只准我逗留屋內兩小時，我帶三個師傅去，放滿浴缸一缸水，兩個小時內都未睇得清楚浴缸漏唔漏水嘅啫。要睇耐啲，業主就話唔賣畀你，我哋邊度敢拗頸呀。最難驗啲樓就係職業炒家買入舊樓，花十零萬粉飾，喺漏水地方用深色乳膠漆，於是水漬可以遮掩一陣，驗樓上有冇水漏落嚟，我哋要拆假天花，業主會喝住，好難搞。」
喺一個賣家市場（sellers?market），買家完全處於下風，買咗層八樓返嚟，裝修好晒，先至發覺十一樓主人房浴室漏水到十樓，十樓漏到九樓，九樓漏落你間八樓，死未？要上面三層樓業主一齊維修，要花一番唇舌，辛苦不足為外人道。