資深導演杜琪峯已經有好多年冇參與「香港電影金像獎」頒獎禮，同樣係姓杜，杜汶澤今年亦憑《空手道》競逐「最佳新晉導演」獎，對新導演嚟講絕對係一種鼓勵。不過，杜汶澤今日喺fb撰寫一篇《大阪遊後記》長文，表示打算缺席金像獎，原因係有機會見到好多「討厭嘅人」。

杜汶澤話知道電影圈仍有好多有良心、良知嘅電影人支持港產片，但當中仍是有好多佢睇唔過眼嘅地方，佢話：「看關於導演會春茗的片段，我看到很多自己很討厭的人，有些原本是朋友，14年之後成為陌路人的所謂同業（其實不是，因為我已經當自己沒有做這一行很久了），有些支持黑警的，有些開口埋口愛香港電影卻在大陸人面前唱香港落後的港奸，有些不要臉亂拍一通企圖騙取大陸觀眾的錢去買錶買車買遊艇的人，我更加覺得，要是為了去一個金像獎頒獎典禮，又要找衣服又要我見這些垃圾，我情願自己去吃個火鍋！我不夠修養，我承認我個心入（面）憎到你哋死。」

有朋友勸阿澤，你討厭人，人哋都好討厭你，咁不如去做個「督眼督鼻」嘅人，但阿澤有自己一套想法，唔想就係唔想。但今朝食早餐時突然有所頓悟，佢話：「因為我突然想起我的提名，是由投票產生的！他們投我一票，就是因為對我的一個認同。當然我要去面對自己這個情緒問題很困難，但我更加要去面對這個討厭的場合，這樣做我才對得起民主制度！我要珍惜大家的票，珍惜大家依然有票。

我把他們的支持，放在第一位，我的感受放下，頓時舒了一口氣.......不好意思，四月十五號，你們會見到我一如以往，樣子討厭地在紅地毯上昂然闊步！」

杜汶澤以短訊回覆《蘋果》﹕「我無嘢回應呀。」

精選娛聞，喺晒《娛果》
http://fb.com/appledailyent