八方做記者呢行，出trip最怕輸新聞，𠵱家有逾百個香港記者去咗四川採訪地震，以行家心態，整親手腳唔會瞓唔着，甩咗古仔反而更加輾轉反側。喺四川災區採訪，香港記者遇上強烈餘震、山泥傾瀉、洪水警報，睇到觀眾、讀者膽戰心驚，但班行家仍然新聞至上，八方真係好佩服！

有線記者林健成日前深入地震重災區汶川縣城，架車行行吓，後方突然山泥傾瀉，漫天灰塵遮到成個天突然黑晒，佢更搞到滿身灰塵，幾分鐘之前駛過嘅路成條唔見咗，都咪話唔驚險。呢段片連中央台都有播出，仲大讚香港記者專業。據聞林健成事後表示驚都冇用，繼續深入災區發報災情消息。
《蘋果》肥仔同事都去咗四川採訪，地震翌日同幾個行家包車出發去重災區映秀鎮，行到半路司機話前無去路，大家要做步兵，「快得很，走三個小時就到。」肥仔孭住器材，袋住兩支水就殺入去。行咗一粒鐘，肥仔覺得唔對路，佢同八方講，問清楚當地人，原來要行50幾公里先到映秀，有人打退堂鼓，佢頂硬上，行行重行行，既驚餘震冧石，又餓又攰，以為去到災區有救濟站補給，點知佢快得滯，救援部隊都未到，「入到去乜都冇，人都冇一個。」
喺災區，記者其實同災民一樣，冇啖好食，無處棲身，只能瞓帳棚，與死難者遺體相距不遠，呢啲經歷真係畢生難忘。凌晨12點，佢喺一個內地記者帶領吓，問災民乞咗三個蛋糕仔嚟填肚，呢個時候終於見到解放軍部隊，部隊話入鎮最後七公里山路冧山泥兼斷橋，不能摸黑夜行，惟有喺公路過夜，一有餘震即刻起身躲避。凌晨6點又起行，終於入到映秀鎮，同其他行家重逢恍如隔世，「以為有人失蹤，見到大家真係好開心。」

八方同事好彩冇穿冇爛，有個攝記卻幾乎跌落河遇險，好彩多得解放軍拉住，個攝記執番條命不禁留下男兒淚。肥仔話今次採訪覺得災情慘過年前南亞海嘯，一來同胞遇難份外傷感，二來好多死傷者係小朋友，目睹生靈塗炭，只能無語問蒼天。八方希望行家支持到底，將災區情況公諸於世，將希望帶入災區。
mailto:[email protected]