當年今日
關於我們
兄長病逝失業弟無力殮葬
蘋果日報 2002/03/02 00:00
阿權自幼與兄長阿安相依為命,手足情深。日前四十三歲的兄長阿安因鼻咽癌病逝,令阿權十分傷心,同時他要強忍着悲痛,四出籌錢辦理亡兄的身後事。蘋果日報慈善基金即時撥款,助阿權支付兄長的殮葬費,解其燃眉之急。
「過年前醫生發現阿哥體內嘅癌細胞開始擴散,需要留醫接受深切治療;年初十晚我接到醫院電話,知道阿哥有生命危險,可惜當晚我趕到醫院,已經見唔到阿哥最後一面。」面容憔悴的阿權黯然表示。
三十九歲的阿權,多年來與阿安相依為命,兄弟倆在港並無其他親人。「阿哥早幾年返大陸娶咗個老婆,點知舊年阿哥證實患鼻咽癌後,阿嫂就冇晒音信,我同阿哥一直冇辦法聯絡到佢!」
社署津貼不足結帳
獨身的阿權續歎謂:「阿哥做開搬運工人,一有病已經保唔住個飯碗。呢幾個月佢身體愈嚟愈虛弱,好多時腳腫兼食唔落飯,我就日日煲粥、薏米水同榨蘿蔔汁餵佢飲,等佢有多啲營養。」
由於本港經濟不景,阿權自己亦陷入經濟困境,「我做咗好多年運輸工人,公司生意愈嚟愈差,成日冇工開,前排我去工會報讀咗幾個再培訓課程,諗住學識電腦、文書處理同簿記後比較容易搵工,點知依然好難有嘢做,惟有靠攞綜援同阿哥捱得一日得一日。」
如今阿安猝死,阿權仍未平復悲慟心情,便要為籌錢辦理亡兄的身後事而四出奔走。「我打算將阿哥遺體火化,安奉喺佛堂,因為佢生前好誠心信佛,想死後用佛教儀式殮葬,但我向社會福利署申請咗殮葬津貼後,重欠九千幾蚊先夠找數,呢幾日我惟有周圍搵朋友借錢,想辦法應付。」
蘋果日報慈善基金了解阿權的情況後,已即時從「殮葬專戶」撥款一萬元,助阿權購買亡兄阿安的骨灰龕及靈位等費用,解其困境。
捐款編號:C0478
暖流熱線
電話:29908688
傳真:23702192
電郵:
[email protected]
網址:
http://www.charity.atnext.com