身在福中的港胞可能不知道，兩天前法蘭西已經超越俄羅斯，成為歐洲第一大國了──說的是武肺確診個案。風水佬呃你十年八年，數字清清楚楚童叟無欺，不是才剛剛加入百萬俱樂部嗎，怎麼忽然便接近二百萬了？壞到一個點，單日確診人數三萬八千幾，樂觀者罔顧專家預言疫情下星期先至見頂，馬上稱之為「回落」，大有鬆一口氣之勢，這樣下去，趕上國際排第三的巴西恐怕不是夢，而是惡夢。人心惶惶不信蒼天信鬼神，電視新聞報美國大選，訪問街頭一個亞裔大媽，破英語七零八落，要不是有法文字幕解畫還真聽不出她嚷些什麼：「陰謀，一切都是陰謀，武肺根本是假的，大半年前左膠精心部署散播謠言，為的就是可以透過郵寄選票舞弊。」哎呀，承你貴言，我都希望係呀！這樣振奮人心的消息當然不需要fact check，百分百可靠，既然拜登奸計得逞，病毒肯定即刻消失，唔信你再等多兩個月，睇吓佢登基翌日報紙頭條係唔係「全球患者一夜之間不藥而癒」吖嗱。