聽番啲老行尊講，近排受到公司裁員和收縮影響，手上一批商廈醞釀退租潮，原本諗住減租來吸引回流，但是去意已決，最後擔心減租連鎖效應拖累現有租金，惟有以高佣來谷班經紀，趁減租潮未來到時盡快搶客，保住租金收入和出租率。
他說這班大富大貴的外資行，面對歐美市場收縮已經好快做好成本控制，除了減人減規模外，還會有Cut房津的機會，而且一Cut便Cut一半，以前4萬削去2萬、3萬得番2萬，換句話說對高價物業租務市場有影響。
這班外資僱員普遍會選擇港島區中西半山和東區一帶、九龍奧運站和尖沙嘴一帶，事實上在過去數年得到呢班賓架租客，租金升得快過細價樓，家回落跌幅將會好急。

業主隨時倒貼供樓

好似位於西半山一個曾創出每方呎100元租金的豪宅樓盤，發展商轉租時講明搵外籍客，不過家班客仔負擔唔起要落價，走去搵大型屋苑租盤，每期租畀少咗但住大咗，一樣可以不減居住質素。
難怪最近位於新界區鄰近一間知名學府的新入伙物業，突然間被搶高兩成租金，當中不少為在中上環返工的金融證券業人士。
一來可以住新樓，二來面積沒有細到，可以同自己交差。
咁搞落去，豪宅租金會否跌得快過中檔屋苑，要知道豪宅租金反映香港經濟活動，假若全港經濟走下坡，豪宅直接受到打擊，租金自然回落到合理水平，老樓認為，金融業持續裁員，連帶一批中產屋苑租金亦受到拖累，將影響租金回報率，家仲守得住3厘，到下半年隨時要倒貼供樓。這意味着樓價好難倒頭回升。

劉兆昌
資深地產傳媒人
http://www.HKLau.com