先個禮拜，王維基嘅香港寬頻出咗兩個廣告，一個係牛頭馬面+Bell（貝爾，發明電話嗰位仁兄），喺地府寸人哋啲電話線唔係用嚟上網；另一個係功夫螞蟻寸人哋上下行唔對稱，連小學生都知，明顯係衝住李察李澤楷嘅8號仔而嚟！咁俾人寸嗰位連續俾人執兩劑，夭心夭肺，心情一定會好唔開心囉！
咁齋坐係解決唔到唔開心嘅，唯一辦法係叫啲𡃁做嘢！嗱，有謂「小李飛刀例不虛發」，8號仔噚日卒之出手，推出比極速傳說更極速嘅PCCW1000M+光纖傳輸服務，而且仲夾埋好多筍plan，有幾筍？ofcourse唔係畀層貝沙灣過你，大致上係豁免好多安裝費同埋月費之類……而且𠵱家1000M都未算勁，遲啲仲有1250M、1600M，務求用佢哋可以圍繞地球26轉嘅光纖綁死你！

新廣告　有隱喻

但華華更欣賞嘅係佢哋噚晚首播、「還拖」老王嘅新廣告──3隻老鼠喺地下掘地鋪光纖，但就搵曾經喺對家嘅廣告上扮過李察嘅阿Jay林海峰──把聲做旁述，好寸咁話：「某啲網絡商鋪少少光纖就扮代表……」而四眼老鼠老闆，個樣睇落仲有啲似阿邊個。總之，呢一趟8號仔叫做點數擊倒老王拉平，唔知正淡出公司嘅老王幾時會還拖？

王維基李澤楷恩怨情仇事件簿

‧2007年5月：香港寬頻投訴電盈廣告誤導得直－05年11月，香港寬頻向電管局，投訴電盈寬頻廣告誤導，指上網上下載速度不對稱

‧2007年1月：台灣地震海底電訊電纜受損－電盈客戶係最大受害者，香港寬頻即推廣告明撬電盈客仔

‧2005年11月：電盈推固網加流動電話綑綁月費優惠－王維基回應：「啲嘢好就唔使搭豬頭骨，我哋冇豬頭骨賣。」

‧2005年3月：固網電話費互相劈價－香港寬頻固網電話月費38元，迎戰電盈劈價四成搶客

‧2004年8月：城電推出寬頻電話服務－城電向電訊局投訴，懷疑有網絡商堵截訊號，矛頭直指電盈

廣告玩嘢　8號仔唔夠揮

王維基同李澤楷可以話係宿敵，佢旗下公司嘅廣告不單止夠出位，而且仲好寸，佢哋嘅廣告吓吓啄住對手8號仔嚟打，就近幾個廣告都係寸對方用電話線上網好慢。
早前宣傳「光纖入屋」嘅寬頻上網，佢哋搵埋「魔盜王」、「五星戰隊」、木乃伊同摔角手等趣怪騎呢角色，揶揄電盈。不過，講到難忘就梗係城電嘅CTI殺價超人，將幪面超人嘅主題曲改成廣告歌詞，「CTI，殺價，殺到，英、美、澳、加」，當時唔少大人小朋友都識唱。
單睇廣告8號仔就弱啲，冇咁多花臣，用得最多嘅招數就係搵明星宣傳，好似06年頭搵鄭伊健、薛凱琪同黃偉文，宣傳「真正寬頻－網上行」，再早啲，就叫李克勤嚟推銷家居固網電話，不過，啲明星一年拍咁多廣告，都幾難令人記得邊個明星打邊個廣告。

mailto:[email protected]