韓國近日連日嚟都進行緊首爾時裝周，好多當紅藝人都被邀請出席睇花生騷，當中少女時代成員Tiffany就最搶手，前日、噚日先走完兩場，今日佢又再現身東大門DDP出席品牌PushButton嘅騷。

雖然首爾天氣開始轉涼，今日只得23度左右，但Tiffany就照舊晒腳大過天，以一條超短金色半截裙襯黑色恤衫上陣，再腳踏黑色鍋釘高踭鞋，性感中帶點型格。而Tiffany全程亦展示佢最親切嘅一面，不停微笑揮手，又用佢對「笑眼」狂放電。而佢對傳媒鞠躬時仲差啲走光添。

不過，有網民見到Tiffany對腳之後就直指「瘦到好似火柴咁」，表示痛心。