當年今日

股壇瀏覽器:太平洋興業博唔過

蘋果日報 2002/04/25 00:00


本港營商環境世界排名俾經濟學人調低6級,由第5名降至第11名,亞洲亦落後新加坡,港府兩司即指報告不公平,又話人哋有偏見。
其實港股過去幾個月表現一直落後其他亞洲股市,已反映投資界憂慮,咁都算係唔中肯?港股冇受經濟學人報告影響,除咗有資金追捧落後股之外,亦與大戶推高期指結算有關,不過結算之後點走就好難講啦。

金禾勿撈底
金禾(090)噚日大跌41%,收報6.9仙,成交661萬元。
傳聞有投資者俾人斬倉,不過據Cookie話,只係有人唔玩沽貨離場。此股成交有限,股價雖跌逾40%,但估計仍未清倉,相信後市重有排沽,所以暫時唔可以撈底。此股先前公布有基金拒絕認購其新股,理由係公司有重大不利變動,公司董事局就當然唔認啦。
太平洋興業(166)噚日一度升至0.65元,已經接近有心人士嘅目標價,若果再大幅上升,有心人士可能隨時反手沽貨套現。噚日收0.57元,短期高位0.65元附近,上升空間只有14%,如果收購及分派計劃告終,股價隨時大跌,值博率極低。
經i師傅提一提,益安(082)噚日果然有腳軟迹象,股價跌2.1%,收0.94元。不過,黑客就話會繼續去,都唔知信邊個好呢?此股本周累積升幅已近40%,短期肯定有人獲利回吐,後市重有冇得去就要視乎幕後人士嘅實力,睇此股成交有限,相信有關人士實力都係麻麻。
阿 虎