所謂「相見好，同住難」，beaprettylady同老友反面搞到要搬屋，但因為有份租約綁住唔知點甩身，惟有喺《香港討論區》求教網友。
據講佢原本同兩個朋友一齊租屋住，租約係3個人一齊簽，死約去到今年7月31日，但因為某啲原因，大家冇可能再住埋同一間屋。beaprettylady話打算呢一兩個禮拜就搬走，預咗唔要自己份按金，但唔知業主會唔會畀佢走？

kslover好奇反問︰「你係唔係想3個一齊唔租？如果係就同業主傾吓，有時佢哋都肯；如果只係你一個走，問題唔喺業主度，係你3個人嘅事，你哋自己傾掂。」
誰不知beaprettylady原來仲未同朋友講掂數，「我諗住月中搬走，就唔交我嗰份租㗎喇，份按金我都唔要畀埋業主，睇吓另外嗰兩個會唔會繼續租囉！佢哋唔畀埋我嗰份（租）嘅話，咪叫業主收樓囉！」
記者幫beaprettylady請教過法律界人士，謝天良律師話如果係3個人一齊喺死約期內退租，根據租務條例，業主有權追討直接損失，包括重新放盤嘅代理佣金、過渡期丟空物業嘅租金損失，甚至新舊租金差額等。
如果純粹係beaprettylady退租，謝律師話最佳做法，係安排業主同兩位朋友坐低簽署一份協議書，確認佢遷出及退租，咁就算第時佢兩個朋友欠租，業主都無權再向佢追討。