菲菲極少上淘寶，一來未見過實貨，靠強國「口碑」，出事機會唔細；再者人仔越嚟越貴，加埋運費未必平，仲要承擔貨不對辦風險，實在唔化算。
不過無可否認，淘寶網阿媽阿里巴巴確有諗頭，旗下支付寶最近推出全新增值服務「餘額寶」。簡單嚟講，內地用戶只要存錢入餘額寶戶口，就代表買咗一隻「增利寶」嘅貨幣基金，一般年息3至4厘；亦可隨時用餘額寶資金去網購，入場費只需1蚊人仔。
阿里咁做，可以話一箭N鵰。1、支付寶嘅錢以後由基金管理，阿里唔再被質疑「呃利息」；2、吸引更多人預先存款，加大網購動力，推動支付寶以至淘寶業務；3、支付寶做埋金融，傳有幾十間基金公司將與淘寶聯手推旗艦店，有助籌備上市嘅阿里巴巴提高估值。
餘額寶收益率絕對撼贏銀行，對飽受濫存問題而頭痕嘅內銀帶來更大壓力。不過正面啲睇，有競爭先有進步，話唔定仲可以推進利率市場化哩。